| تبليغات | X |
الف ـ شعرين فورمو: شعرين كمپوزيسيونو اولمالیدیر، یعنی بوتون كاراكتئرلري بير بيریيله اويغون اولمالیدیر. ب ـ شعرين ديلي، تاليف باخيمیندان گوجسوز اولمامالیدیر. ج ـ شاعيرين اؤزل باخيشي يوخسا لحني: شاشيردیجی اولمالیدیر، تعجبلنديرن، ديكسينديرن. بلکه ده، آغلادیب گولدورن! د ـ شعرين ايچَريسي: شعر اؤزو و باشقالارییلا صادق اولمالیدیر. آیری سؤزله، ساختا اولمامالیدیر. شعرين اؤزونه عايید منطقينه سيغینسین، او بیری ژانرالار اونو ايفا ائده بيلمهين بیر ایش گؤرسون، اونو اوخويوب اوخوماماغينين فرقي اولسون. بوگونکو شاعیر، آرتیق سؤزلري يازماقدان چكينیب اوخوجونون دوشونجهسينه سايغيیلا یاناشمالیدیر.
ـ اينديکی ادبي آخیملار، هانسی دورومدادير؟ بو ساحهده ايشلهينلري نئجه گؤرورسونوز؟ دَیَرلندیرمکدن واز کئچین لوطفن!
ـ سایین شاعيرلر، يازيچيلار، آيدينلار و صنعتچيلر آجيماسا، ايشلريمیزین پروفسيونال اولمامادیغینی سؤیلهمک ایستردیم. بيلمهديیيميز شئيلر چوخدور! سوسيولوق باخيمیندان، توپلوموموزدا بوتون پتانسيللري مستهلك ائديب يوخا چيخاردان "مدرن بیر جاهليت" وار. انفورماسیا (اطلاعات) آنباري كيمي، آداملاريميز پوزغون اؤيرتيم (آموزهلر) و علملرله دولودورلار. ذهنلرين تحليل گوجو يوخدور. توپلوموموز فلسفه شارحي، فلسفه ایشچیسی، فلسفه چئويرمنی ایله دولودور، آنجاق بو آرادا، گئرچك آیدین (روشنفكر) چوخ آز گؤرونور.
بیز، اؤندر و بونونلا یاناشی آوانقارد اولماغا چوخ تلهسیریک. چوخلاریمیز اؤزلرينی دولاندیرا بیلمهدن، جاماعاتا آغ ساققالليق ائتمک ایستهییر. بئله کیمی آداملار، بيلمهدن و جهالت اوزوندن، قورولموش اوجاقلاري داغيتماقدادیرلار. ادبيات و فلسفه، خَللاق اينسانلار طلب ائدیر. خللاق دئييلسنسه، يازيچي اولا بيلمهيهجكسن! اونلارين جهدي زوراکارليغا واريب زیانلار تؤرهدير. بو خستهليكلر، ادبياتين و فلسفهنين انگليدير و بوردا قارانليغا اوغرايان بيزيم جمعيتيميزدير. هر نهیی بیلدیکلرینی ظن ائدن باسما آيدينلار! بیزیم ماكت آیدینلاریمیز، هله قولتوغا قارپیز وئرمکدن و بیر بیرینین قانینا یئریمکدن آيريلا بيلمهييبلر. گئرچک آیدینلارین ايشينی، چيلخا دوشونجه یاراتماق، يول گؤسترمك و يولا ايشيق سالماق بیلسهک، اوندا پروقرام وئرمك، يول آچماق و چيرمانيب دسته، حزبه قوشولماق ندیر؟
شعر و هنر اخلاقدان سونرا باشلانير، دينـدن سونرا، فلسفهدن سونرا. بير باخیشا گؤره، چوخ يوخسول و چوخ دا وارلي بیر توپلومدا دئییل، شعر نرمال و اویغون بير توپلومدا يارانیر (اؤرنهیین، توركيیه و لبنان كيمي اؤلكهلرده.) بيزيم شاعير ـ يازيجيلاريميز، هله ساده و ایلکین اخلاقي و علمي سؤزلرده قالیبلار...
ـ توتاق دئدیکلرینیز دوزدور! سیزجه بو دورومدان چیخاجاق یولوموز نَدیر؟
ـ اساس و تمل بيلگيلري ايكي یئره، الف ـ اتيولوژي (علتشناسي) و ب ـ پاتولوژي (آسيبشناسي) قوللارینا بؤلمک اولار. اتيولوژي دئیییمده، فلسفي باخيملاردان دانیشماقدایام. بير شاعير یوخسا يازار، هر ندن اؤنجه، نه اوچون يازدیغینی اؤزو اوچون آیدینلاشدیرمالیدیر. دوغرودان نه اوچون يازير؟! یازماقدان باشقا، آیری ژانرلاردا ايشلهمهسی بلکه داها ياتيجي اولدو؟ يا دا اصلن آيري بير ایشین داليسوره گئتمهسی؟
ايكينجي اساس بيلگي بودور كي، هنري و ادبياتي انگللهين آفتلر هانسیلاردیر؟ الیمیزدن گلنلر، الیمیزدن گلمهینلر، فورصتلر، تهديدلر؟ بوردا ایکی اؤنملی قونویا دا توخونمالییام: بوتؤلوکله بيري اخلاقدير؛ قوتسال ايناملار، دينلر، میللتلر آراسي اورتاق ساییلا بیلن بیر پارا دَیرلر. او بیری ایسه هر جغرافيایا عایید اولان مذهبی مناسبتلري.
بو گونکو ادبياتچي هر ندن اؤنجه مدرن بیر وطنداشدير. اؤرنهیین، اؤزو دیکتاتور اولان یازیچی نئجه باریشدان يازسین آخی؟ بوندان سونرا، ايشلَتديیي سؤزجوکلرین آنلامینی بیلمهلیدیر؛ یعنی اؤزگورلوک (آزادی) نه دئمكدير؟ ادبياتدا فلسفه ایله سوسیولوژی نه معنيلر داشيیير؟ و بو کیمی سورغولار. بوندان دا کئچنده، شاعيریمیز، یازیچیمیز اؤز یاشادیغی توپلومونو دریندن تانیمالیدیر. او، اؤز اوخوجوسونو تانيماسا، کیمه یازماق ایستهدییینی، و نئجه یازدیغینی هاردان بیلهجک؟ اوخوجونو تانيماق، هم "پارناسچی"ـلارا گرهکلیدیر، همی ده ادبیاتی توپلوم قوللوغوندا بيلنلره.
ـ بوتؤلوکله ادبياتين، و اؤزللیکله شعرين گليشمهسينه هانسی فاکتورلارین اولماسی اؤندهدیر؟
الف ـ بيلدییینیز کیمی، حرفهای شکیلده يازيب ياراتماغا اوخوماق لازيمدير. فرانسهلی شاعير "ژاک پرهور" دئميشكن: "دوزگون بیر شعر يازماق اوچون، يوزلرجه دوزگون شعر اوخوماق، يوزلرجه يئری گؤرمک، يوزلرجه آداملا تانيش اولماق گرهکلیدیر." يازيب ياراتماق، خلوت طلب ائدیر. چاغداش وطنداشین خلوتي ايكي يؤندن پوزولماقدادیر: اونون رواني خلوتي چاغداش تكنولوژينين بوروكراسيسی ائتکيسی آلتیندا آرادان گئدير، جسمي خلوتي ایسه یوخسوللوق كؤلگهسي آلتیندا محو اولور. سؤزون آچیغی، آلتمیش متیرليک کیرایه ائوده، بیر عايلهنین ده خرجلرینی بوینونا گؤتوردوکدن سونرا، هانسی خلوتدن دانیشماق اولار؟ دئدیییمیز بو یازیچی، گوندهلیییندن باشقا، خرجلریندن باشقا، بورجلاريندان باشقا، آيري بير زادا هئچ دوشونه بیلَرمی؟
یارادیجیلیغا، بو ایکی خلوتین الده ائتمهسی گرهکلی گؤرونور.
ب ـ علمي تنقدين يارانماسي، تنقید مكتبلريیله دریندن تانيش اولماق.
ج ـ ادبيات اقتصادينين گليشمهسي. بو گون، شعرده گرگینلیک وار، شاعيرده گرگینلیک وار، اوخوجودا گرگینلیک وار. بونلار هله قیراقدا قالسین، يازیچیلارلا كيتابلارين سایینا باخدیقدا، ادبياتچيلارین ادبيات اقتصاديندا بيرينجي دوشمن اولدوقلارینی گؤروروک.
د ـ ادبياتين گليشمهسينه سبب اولاجاق باشقا شئیلر ده وار؛ توپلومداکی نئچه اؤلچولو قونولار كيمي. ایراندا باشقا ديللرده چیخان كیتابلار قدَر، بيزیم ده اساس كيتابلاریمیز اولمالیدیر. فلسفهده، سوسیولوژیـده، ادبي تنقيدده و آیری آیری قوللاردا، شاعير يازيچيلاریمیز اورَک ائدیب اؤز كیتابلارينی یایماغا چالیشمالیدیرلار. بئلهده، اوتوماتيك تنقيد و تنقيدچي ده يارانار!
بونلار هاميسي سؤزدهدير، گئرچکده آنجاق ايش بيز آز فرقلي اولور. "دوكتور گلدوزيان" دئميشكن: «حق نه وئرمهلي، نه ده آلمالي! حق یالنیز، يازيلماليدير!!» (بو دا ساتيرا يؤنوندن!!!)
ـ آد قازانماغا، آد آچماغا، یا همن شؤهرته گؤره ده بیر آز دانیشاق!
ـ شاعير یوخسا يازيجي آیری آیری يوللارلا آد قازانا بیلر، آنجاق "سئویملی" اولماق اوچون سؤیلهدیییم سيناقلاردان کئچمهلیدیر. شعر آزادليقدا يارانار... سورغولارا جاواب آختارماق کئچیدینده (پروسئسینده)، بوتون سواللارين جاوابی شاعیره قاباقدان بللي اولماسی، يا دا تاپشيريق كيمي اونلاری قبول ائتسهسییله شعر يارانماز. فلسفه و دين ایله شعرين فرقي اولورسا، ائله بورالاردادير. گئرچک شاعیر، همن سئویملی شاعیردیر.
ـ شعرين، ادبياتين فايداسي ندير؟ نه اولسون کی؟! بعضيلره گؤره، شعرين واختي سوووشموش، یئرینی ده باشقا هنرلر توتوبدور...
ـ الف ـ"ارسطو"دان "سيدني"ـيه، "سيدني"ـدن "كولريج"ـه، "كولريج"ـدن "شيلي"ـيه، "آرنولد"ـا، هر كس بير باخيمدان شعردن ساوونوبدور (مودافیعه ائدیبدیر.) "ارسطو" شعرده تزكيه گوجونو آچيقلاييب... شاعير بير ياراديجيدير، نه تقليد ائدن! تقليد ايشينه ال ووران، بلکه ده ائله سایین اوخوجودور.
شعرین ال وسیلهسی سؤزجوکدور، ها بئله نثرین ده. آمما شعرين ماهييتي، مقصدی تام فرقليدير. شعرين جینسي خيالداندير، مقصدی ایسه گئرچهیی القا ائتمك. اخلاقي گئرچک یوخسا عقلاني گئرچک. شعردن لذت آلماغين سببی ده بورداندير، چونکی گئرچک اؤزو لذت باغیشلایان بیر شئيدير. نثرده بو مقصدلر مستقيم الده ائديلير، شعرده آنجاق غيرمستقيم. شعرده ایلک مقصد لذت آلماقدير.
ب ـ چاغداش دؤورون، مدرنيتهنين آجيلاريني آرادان قالديرماق، ادبياتين، هنرين و هامیسیندان یئترلی اولاراق، شعرين اليندن گلر. بوگونكو ياشايیشي دا، هميشه كيمي شعر آچیقلامالیدیر. شعر انسانا توختاخلیق وئریر. بونو كيم دانا بيلر كي، شعري انسان يارادير و شعر انسانلارا گوجلو ائتکی بوراخیر؟ انسانين هر بير ايستهيینی یئرینه یئتیرن هر بیر شئی، دَیرلیدیر و شعرين ده دَیری بورداندير. نئچه مين ايللیک دوشونجه تاريخینی نظره آلاراق، بیلگی (علم) انسانی تام شكليده آچيقلايا بيليبمی؟ انسانين چوخ تجروبهلري هله ده گيزلي قاليبدیر، شعر ده بو تجروبهلردن بيري ساییلیر.
ج ـ ادبیياتلا توپلومون دَیرلرینی و نورملارينی مقايسه ائتمك اولار. انسانين ذاتيندا عوصيان وار. ادبياتدا، بو عصيان، خيالدا جلوهلهنير و ادبي فورملاردا گؤرونور. باشقا آداملاردا، بو عوصيانی سوچ (بِزه) و انحراف کیمی آدلارلا تانیییرلار. اؤتموش تئوريلرين هاميسيني بيلمك گرهکلیدیر؛ "سقراط"ـدان "دوت پوپر"ـهجن. هر انسانين يارانیشیندا، گئرچکدن بير پاي وار. سن گئرچهیی گؤتور، قالانينی بوش وئر! بیز هله بو کیمی ياشاماغي اؤيرنمهميشيك...
ـ ادبیاتدان دانیشدیقدا، ایستر ایستهمز، ادبي تنقددن ده سؤز گئدیر. بئلهدیر یوخسا ...
ـ تابولاري سیندیرماق، بوتؤو (کلی) حؤكملري دانماق، ادبی ياراديجيقلارا یاناشماقدا بو بویروقلارین زيندانيندان قورتارماق ادبي تنقدين گؤرهویدیر (وظيفهسيدیر). ادبي تنقید، هنرين ایشلَمی (كاركردي) وار یوخسا یوخ سورغوسونا جاواب وئرمهلیدیر. ایشلَمی يوخدورسا، بونون دَیری ندير بس؟
هنرین ایشلَمی وار، یعنی هنر بير آراج (رسانه) كيميدير. بئله اولورسا، اونون سؤزو اولمالیدیر. بو سؤز، خودبسنده یوخسا ديشاريیه ارجاع وئرن، ایدئولوژيك یوخسا غیر ایدئولوژیک، آرماني یوخسا غیرآرمانی، شهودي يوخسا دوشونجهدن آلینمیش، آچیقجا یوخسا یوزوملو اولا بیلر و ...
هنرین ایشلَمی اولدوغو حالدا، ادبی تنقید، اونون دا مدنی بیر شئی اولدوغونو آچیقلامالیدیر (او بیری اشیالار کیمی.) بئله اولدوقدا، او دا، آل وئره قویولان شئیلرین یاسا ـ قایداسیندان تبعیت ائتمهلیدیر. هنر شئیدیرسه، مخاطبلرين ذؤوقونو، زمانهنین ایستکلرینی علمي امكانلاردان یارارلاناراق، نظرده آلمالیدیر.
شعر ده بير شئیدیرسه، یاریش گئدیشینه (رقابت چرخهسینه) دوشمهلیدیر، آرتيق اوخوجو قازانسین دئیه، اؤز باجاریغینی ثابت ائتسین دئیه باشقا هنرلرله یاریشمالیدیر. اونون امكاناتينی اؤز قوللوغونا گتيرسین دئیه حتتا بیلگی ایله ده رقابت ائتمهلیدیر.
ـ شعرله نثر آراسیندا فرضی بیر یاریش نظرده آلساق، داها آرتیق اوغور قازانان نثردیر یوخسا شعر؟
ـ "شعر اولان يئرده دوشونجه چاتيشمامازليغي وار و يا استبدادين گوجو چوخالديقجا نثر گئري اوتوروب شعر ايرهلي یورویور"، کیمی سؤزلری سؤیلهین تئوریلرین نهقدر گئرچهیه ياخين اولدوغو، سایين اوخوجولار و شاعيرلريميز نظرينه قاليب... آنجاق نئچه مين ايل سابقهسی اولان شعر، چوخ زامانلار نثرين ده يوكونو داشييبدیر یوخسا یوخ؟ يونانلي "سولون" آدلي حكيم، سؤزلرينی نظمه چكيب شعر شكلينده ياراديردي، چونکی او زامان نثرين مخاطبي يوخ ایمیش. او زامان، حكيم و آیدین تانينسينلار دئیه شعر يازارميشلار! اونلار هم بیلگین (عالیم)، هم شاعير و هم منجم ايميشلار. ايندي ايسه بو تاريخي باسقي آلتيندا، بعضي آیدینلاریمیز دا، گؤرورسن هم طب حكيميدير، هم شعر يازير. فيلسوفدور، آنجاق شعر ده يازير. مجتهد و دين بیلگینیدير، رحمته گئدندن سونرا گؤرورسن نئچه شعر ديواني دا وار ايميش...
سون سؤز بو كي، دوزگون و دَيرلي اثر لازيمدير؛ ایندی هر ژانر اولورسا، اولسون. بوگون ادعا چوخ، ياراديجيليق آزدير. بؤيوك و داها آغير نيسگيلیمیز بودور.
ـ شعردن دانیشدیغینیزدا، فلسفهنین ده سؤزو چوخ گئتدی. "ايسم"لره گؤره، و بو سیرادان مدرن و پستمدرن يازيچي و یارادیجیقلارا گؤره نئجه دوشونورسونوز؟ بوردا، آنلام دا، سؤز قونوسوندادیر...
ـ الف ـ "ارسطو" دئميشکن "گئرچک، "افلاطون"ـدان دا سايغيليدير". بيلدییینیز کیمی "ارسطو"، "افلاطون"ـون اؤیرنجیسی اولموش آنجاق دونیا گؤروشلری "افلاطون"ـدان تام باشقادير. منجه، هله ده، "من كيمم؟" سورغوسو، سواللارین لاپ باشيندا دوران سورغودور. هانسي جغرافيادا ياشاييرام؟ گؤردویونوز كيمي فسلفهنين ده باشليق سورغولاری بونلاردير. آیدین (روشنفکر) كيمدير؟ و مؤوجود دورومون چاتيشمازليغينا، عَيبهجرليیينه نئجه ياناشير؟
انسان ياشاديغي جغرافيانين ائتکيلري آلتيندادير. تاريخی، کوتلوی، رواني و حتتا فيزيولوژي گرهکلرین چرچیوهسینده انسان هم ائتکیلنیر، هم ده ائتکی بوراخیر. شعر فلسفه دئييل، آمما شاعير فيلسوف اولمالیدیر. يعني اؤز سورغولارینا جاواب آختارمالیدیر.
سؤزلرين ائتکی و كسري اولمامادیغیندا، حتمن سببلر وار. بلکه ده، قلملر و یارادیجیلیقلارین ايچي بوشدور؛ بلكه ده، چاغداش انسانين "تحريك آستانا"سي چوخ يوخاري گئتمیشدیر. بئله اولورسا، شاعير، يازيچی دا درين و آغير دوشونجهیله قونولارا قاتیلمالیدیر.
ب ـ بیرینجی ـ پستمدرن، مدرنيتهنين نقدينده يارانيبدیر. مدرنيتهني تام دوشونمهسك، پستمدرنـدن سؤز آچماق يانليش بير ایفادهدیر. پستمدرن، مدرنيتهده شوبهه یاراتماقدیر. نیيه؟ چونكو مدرنيزم اؤز یاسا قايدالارينا وفالی قالمایيب، حتتا اونون ترسینه ده ایش گؤروبدور. انسانین ديرچهلمهسي، اؤزگورلویو و اعتلا تاپماسی مدرنيزمین ادعاسي ايدي. آنجاق، بیز، ایندی پول، اشیاپرستليك و طبقاتي سلطهنین آرتيق ديرچهلمهسینی گؤروروک. ايكينجيسي ـ مدرنيزم عقلانيتدن دانیشیر و عقلاني اولمایان هر شئیین گؤورو قازيلمالیدیر. آمما همن بو عقلانيت، استبدادي تئوريزه ائتدي و تكنولوژي گوجويله كوتلهنين گؤورونو قازدي. اوچونجوسوـ مدرنيتهنين مادي نئجهلییینه باخماياراق، معنويت، دين، اخلاق تهلوکهیه دوشوب، اولوسلار آراسيندا بؤیوک ساواشلار باش وئرمیشدیر. ايندي ده، هله بو ساواشلارین کؤکو قوروماييبدیر... پستمدرن بير باخيمدان، اينسانلا انسان و اينسانلا طبيعتين آراسیندا اولان ساواشلارين سونو گلیب چاتیبدیر.
ج ـ پستمدرن آخيمي باتیدا (غربده) مثبت ايزلر قويوبسا دا، بيزلره همن ائتکینی بوراخاجاغینا هئچ بير گرَک يوخدور. باتیدا، پستمدرن، مدرنيتهنين ييرتيجي سورعتينين ساخلاجیدیر (تُرمزيدير.) مدرنيزم، طبيعتي آز قالا آرادان آپارسين. اوردا ائكوسيستملرين دَييشمهسي، اوزون لايهسينين آرادان گئتمهسي و بیلگینین سَرتليیيندن سؤز گئدير. يعني يئني تكنولوژينين ایگيرمينجي یوز ایللیکده یاشایان انسانلارا وئردییی پاي! بیلگیسینه، عاغلينا گووَنن انسان، دين و گلهنکلري (سنتلری) دانان انسان، بيردن بيره گؤزونو آچيب یئرینه بیر زاد تیکمهدییی بوتون كؤرپولرين اوچماسینی گؤردو. البته پستمدرنيزم گئرییه دالمیش بیر آخيم دئييل. چونكو كئچميشين اؤنملي و انسانسئور فاكتلاريندان فايدالانير و مدرنيزمين بو جور تام شكيلده گلهنکلرینی دانماسیندان چکینیر...
ـ ادبي بحثدن اوزاقلاشماياق! بو آخيملارلا پستمدرن شعر و ادبياتين نه ایلگیسی وار؟
ـ بوردا، پستمدرن شعرين نئچه اؤزَللیییندن آد چکیب، هاردان ایسه سو ايچمهسينی گؤز اؤنوندن کئچیریریک:
* شعاردان و يئكه يئكه دانيشماقدان چكينير: هر ايدئولوژي شعار وئردییی همن سؤزون ترسینه چئوريليب. بوتؤو (كلي) حؤكملر نئچه ايل صادر اولدوغوندان سونرا، دانینير يا دا ایتی انتیقادلارلا اوز به اوز اولور.
* كلاسيك شعرين آماجي، اؤیرتیم (آموزش)، تزكيه يا دا اخلاقی قونولارا توخونماقدیر، آنجاق پستمدرن شعرده هئچ بير مقصد ايزلَنمير. بیلگینین گونو گوندن ایرهلیلهییشینه گؤره، سؤیلهدیییم آماجلار، باشقا قوروملارین (نهادلارین) گؤرهویدیر (وظیفهسیدیر).
* كلاسيك شعر ايچَريیه دوغرو گئدير، مدرن شعر آنجاق ابهام تؤرتمکله مشغولدور. پستمدرن شعر آنلامین ترسینه اولان بير شعر اولاراق، هئچ بير سؤزه اينانماماق گرهیینی سؤیلهمکدهدیر. بوردا، گئرچکده هئچ بیر سؤزون اعتباري يوخدور.
* كلاسيك شعر ذهني آنلاملار داشييیر، مدرن شعر ايسه عينييته دوغرو گئدير. نسنهلردن سؤز آچير آنجاق پستمدرن شعر هئچ بير آندلاشمايا (قراردادا) قوللوق ائتمير. چون هر بیر کسکینلییه (قطعییته) شوبهه ایله یاناشیر.
* كلاسيك شعر تام ديلين قورولوشو اوزره يازيلير، پستمدرن شعر ديلين یاسا قایدالارینا باش اَیمير.
* كلاسيك شعرده بير سسلیلیک (تکصدایی) وار، آنجاق پستمدرن شعرده نئچه سسلیلیکله (چندصدایی ایله) قارشیلانیریق؛ نئچه زامان و نئچه فضایلا. چونكو پستمدرن شاعر، گئرچک هئچ بیر كسين کَبینینه سالینماییب دئیه دوشونور و هر سسده گئرچهیین بير ذرهسینی بولماقدادیر.
* كلاسيك شعرده جدي و قاشي دویونلَنميش بير شاعیري گؤرورسن، آمما پستمدرن شعرده ساتيريك بير باخيش گؤزه چارپير.
هله ده، سیاسی شعره یؤنهلیشلر (گرایشلر) آز دئییل. بونون سببلرینه توخونمادان، سیاسی شعرله شعار شعرینین فرقلریندن دانیشین؟
ـ شعر قونولاري" lyric، غنايي"، "epic، حماسي" و"oastoral، شباني"ـدن عیبارتدير. بو سیرادا، "politikal poetry" سؤزجویونو گؤرمک اولمور. گئرچکده، سياسي شعر بو اوچ قولون اوچونده ده يارانا بيلر. سیاسی اولمایان قونولار، هئچ بارماق سايي قدر اولماز... آنجاق شعار شعري، سياسي شعرين ان آشاغي سَویهده اولانيدير. بوتون توپلوملاردا، سياسي شعر گوج قوروملارینین قارشيسيندا دایانیر. بو گوجلر، هردن فرد، هردن حؤكومت، هردن ده ائله خالق ایچیندهکی گوجلردیر. سياسي شعر گوج قوروملارینی يا گؤیه قالدیرماقدادیر، يا یئره سوخماقدا. مدرن بیر سياسي شعر بونلارین هر ایکیسیندن ده چکینیب، انتیقادي شعره چئوريلیر. البته بعضیلرینه گؤره، سياست، شعرله تام قارشیدا دورور و بو دورومدا، یازیقلیقلا، شعر اودوزماقدادیر.