"آفتاب آذربايجان" درگي­سينين "غفور تقي­اوغلو" ايله دانيشيغي

قايناق: آفتاب آذربايجان -  شماره 24 - آذر 78

نييه  شعري سئچدينيز؟

اوشاق ايكن خالچا توخويان اوشاقلاري ايشله­يه ايشله­يه شعر اوخوماق حاليندا گوردوم.. عاشورا گونوده شئبح اوخويونلارين ديليندن چئشيدلي نظم قاليبلريني ائشيتديم. ائويميزده كي امير ارسلان، شاه اسماعيل، بوستان وگلستان كيمي كيتابلار اوخودوم. ايلك اونجه، من بونلارلا دونيايا شعر باجاسيندان باخماغا ماراقلانديم سونرالاراورتا مكتبدن باشلاياراق، اينشالاريمدا شعر يازماغا باشلاديم.

اون بئش ياشيمدا راديو تلويزيوندان اؤز شعرلريمي ديكله­مه ائتديم. مين اوچ يوز آلتميش بئش ده  "ارتش" آدلي سينمادا اوستاد "شهريار"­ين اليندن اؤدول آلديم. تبريزبيليم يوردوندا اويرنجي اولدوغوم ايللرده  گونوم ادبيات قولونون كتاب­خاناسيندا كئچيردي. اورانين ادبيات كيتابلاريني اوخوموشام.

اوندا ادبي درنك­لره­ده چوخ گئتميسن؟

آز چوخ،  بلي ... بيزيم اؤلكه­ده NGOلار حاققيندا علمي آراشديرمالار اولماييب. اؤزه­لليك­له، اينجه صنعتNGOلارييلا باغلي. NGO دولته باغيمسيز  بير قوروم ساييلير. بو سؤزه داياناراق درنك­لريميزده گوردوگوموز ايشلر آز اولوب. بيزيم درنك­لرده هنري انگلله­ين شي­لر وار. ”جهالت­لر و حسادت­لر".

آذ ياز: غفور تقي اوغلو 1350ـجي ايلده، خياودا دوغولموشدور. اردبيلين ادبي چئوره­لرينده تانينميش تقي اوغلو، بورانين بيليم­يوردلاريندا اوستاد كيمي ايشله­يير. «تالواسالي گون­لر» باشليقلي شعر توپلوسو، اونون ايلك كيتابي­دير. ايندي ليكده «حقوق» اوزره دوكتورا ا‍ؤيرنجيسي دير.

بو دانيشيق،‌ سايين رضا كاظمي­ـنين ايش­بيرلييي ايله حاضيرلانميش­دير.

***

يئني نسيل، يئني ايز (5)

غفور تقي­اوغلو ـ‌ شاعير

ياراديجيليق؛‌ ان بؤيوك نيسگيل!

دانيشيغي آپاران: محمود مهدوي

ـ بیز بیلن، شعردن باشقا، او بیری ژانرلاردا دا چالیشمالارینیز اولموش­دور. آنجاق ايلك كيتابينيز شعر كيتابي اولدو. نییه؟!

ـ بلكه ده شعر مني سئچدی! من همیشه ایستردیم كلمه‌لر اؤزلري دانيشسين. اونلاري شاللاقلاييب، «اهرام ثلاثه» تيكديرمکدن چَکینیرم. بير ده، يالنيز، شعر حقيقته ياخينلاشا بيلیر! گئرچك صداقتي ­ده، بو ژانردا گؤرمك اولور. آيري ژانرلارا ساختاليق، تاپشيرما، تملق و ايكي­اوزلوک تئز سوخولا بيلیر.

ـ سيزين تعريفينيز شعرد‌ن ندير؟

ـ شعر گؤي­لره اوچماق آرزوسوندا اولان، قورولوقدا ياشایان دنيز جانلي‌سي­دير. شعر هم اضطیراب يارادار، هم اضطیرابي آلار. هردن ده، توختاخلیق وئرسین دئیه بیلَرکدن اضطیراب يارادیر. شعر بير باخيمدان هيپنوتيزمه بنزه­يير، اینساني بو دونيادان قوپاريب يوخويا وئرير. ايسته­ديك­لرينی ایسه اونا تلقين ائتدیکدن سونرا، اونو اويادير. بو اويانيشدا، ساغلامليق، توختاخلیق، يئني دوشونجه­لر و یاشاما يئني بير گؤزلوك آرخاسیندان باخماق کیمی شئی­لر وار.

ـ شعرينیزي باشقا شعرلرله توتوشدوراندا، غفور تقی­اوغلویا عایید اولان هانسی اؤزللیک­لردن دانیشا بیلرسینیز؟

ـ هر شعرين ايلك میصراعي تانري­نين هديه­سي­دير، قالانی ایسه شاعيرين زنگين تجروبه‌لري. شعريم ساده و آخيم­لي اولسون دئیه چالیشمیشام، باسما اولماسین، حركت شعري اولسون، دايانيب کئچميش­لره مرثيه سؤیله­مه­سین...

ـ اوغورلو شعر و اوغورلو شاعيرين اؤزللیک­لری؟

ـ منجه، اوغورلو شاعيرد‌ن دانيشماغا، اجتیماعی ـ سیاسی مسئله‌‌لري ­ده اورتایا گتیرمک مجبورییتینده قالیریق. پروپاقاندا و اونون ائتکي‌لريندن واز کئچمک اولارمی؟ اؤز حياتيندا مهجور قاليب، تانينمايان چوخ شاعیرلر وار... آنجاق، اوغورلو شعرد‌ن دانيشماق اولار: بیرینجیسی ـ اوغورلو شعري دینله­ین کیمسه، بو سؤز منيم دفعه­لرله اوره‌ييمدن بئينيمدن کئچن سؤزدور دئیه دوشونمه­لی­دیر. ايكينجيسي ـ شعرين ائتکيسي آلتيندا قاليب دؤنه‌لرله او شعرين سطیرلرینی اؤز اؤزونه پيچيلداسین، شعري خاطیرلاییب اونونلا ياشايا بیلسین. اوچونجوسو ـ شعري اوخوياندان سونرا، بير شئي منده آرتدي دئیه دوشونسون. دئديیيم اؤزللیک­لری اؤلچمه­يه آيري پارامترلر ده، وار: